उपेन्द्र यादवको प्रस्ताव: जनताबाट निर्वाचित ‘राष्ट्र प्रमुख’ चाहियो, सरकार प्रमुख होइन

जनकपुरधाममा आयोजित जसपा नेपालको मधेश प्रदेश अधिवेशनमा अध्यक्ष उपेन्द्र यादवले संविधान पुनर्लेखन गर्दै जनताबाट प्रत्यक्ष निर्वाचित राष्ट्र प्रमुख कायम गर्नुपर्ने बताएका छन्। उनका अनुसार वर्तमान व्यवस्थाले स्थिरता दिन नसकेकाले प्रत्यक्ष कार्यकारी राष्ट्रपतिले मात्र सांसद किनबेच रोक्ने र राजनीतिक स्थायित्व ल्याउने दाबी गरे।

यादवले अहिलेको निर्वाचन प्रणालीलाई “खिचडी प्रणाली” भन्दै पूर्ण समानुपातिक प्रणाली अपनाउनुपर्ने सुझाव दिए। उनले कांग्रेस र कम्युनिष्ट पार्टीले ३५–३६ वर्ष देश शासित गर्दै पालैपालो “लुटेको” आरोप लगाए। सुन, ओम्नी, भुटानी शरणार्थी, ललिता निवासजस्ता काण्डहरूले युवामा आक्रोश चुलिएको बताउँदै उनले सामाजिक सञ्जालमा नियन्त्रणपछि आक्रोश विद्रोहमा परिणत भएको उल्लेख गरे।

उनले देश राजनीतिक अनिश्चिततामा फसेको, चुनावको वातावरण नरहेको र सरकार–संसद विघटन संविधानसम्मत नभएको टिप्पणी गरे। अधिवेशनमा युवानेता योगेन्द्र राय यादवले पनि प्रदेश अध्यक्षमा उम्मेदवारी दिन घोषणा गरेका छन्।