रास्वपामा देखिएको नेतृत्व द्वन्द्व परिवर्तनको गतिमा बाधा : सुमना श्रेष्ठको टिप्पणी

राष्ट्रिय स्वतन्त्र पार्टी (रास्वपा) की पूर्व सहमहामन्त्री सुमना श्रेष्ठ ले दलभित्रको नेतृत्व बहस र समन्वयको कमीले परिवर्तनको अभियान नै कमजोर बनेको आरोप लगाएकी छन्। उनले नयाँ विकल्प निर्माणको आवश्यकता अझै प्रस्ट रूपमा देखा परेको बताएकी छन्।

रास्वपाबाट बाहिरिएकी सुमना श्रेष्ठले परिवर्तनको अपेक्षासहित अगाडि बढेको राजनीतिक यात्रा नेतृत्व विवाद र व्यक्तिगत स्वार्थ का कारण अवरुद्ध भएको दाबी गरेकी छन्। उनका अनुसार, परिवर्तनको नारा मात्रै पर्याप्त छैन, त्यसलाई व्यवहारमा उतार्न सक्षम सामूहिक, स्पष्ट र जवाफदेही नेतृत्व अत्यावश्यक छ।

सामाजिक सञ्जाल एक्समार्फत आफ्नो धारणा सार्वजनिक गर्दै उनले पुराना दलहरूको सुधार हुने सम्भावनामा भरोसा गर्नु अब अर्थहीन भएको समेत बताइन्। श्रेष्ठले लेखिन्,
“पुराना राजनीतिक दलहरूले पटक–पटक सत्ता पाए पनि ठोस परिणाम दिन असफल भएका छन्। उनीहरूका एकता र सहकार्य पनि प्रायः चुनावी स्वार्थमा मात्र सीमित हुन्छन्।”

उनका अनुसार, परिवर्तनको पक्षमा उभिएका नयाँ शक्तिहरू समेत समन्वय, दृष्टि र नेतृत्व एकताको अभाव मा अल्झिएका छन्।
“अहिले चुनौती विचारको होइन, नेतृत्वलाई कसरी साझा बनाउने भन्ने हो,” उनले भनिन्, “त्यसैले सबै रूपान्तरणकामी शक्तिलाई एउटै फ्रेममा ल्याउन सक्ने सामूहिक नेतृत्वको आवश्यकता देखिन्छ।”

श्रेष्ठ हाल नयाँ राजनीतिक पार्टी गठन गर्ने तयारीमा रहेको जानकारी सार्वजनिक गरिसकेकी छन्, जसले नयाँ राजनीतिक विकल्प खोजिरहेका मतदाताहरूलाई लक्षित गर्ने अनुमान गरिएको छ।