‘रिच ड्याड, पोर ड्याड’ अब आधिकारिक नेपाली संस्करणमा, कथालयले लिए प्रकाशन अधिकार

विश्वभर लोकप्रिय पुस्तक ‘रिच ड्याड, पोर ड्याड’ को आधिकारिक नेपाली अनुवाद अब कथालय इन्क प्रालिद्वारा प्रकाशित हुँदैछ। यसका लागि अमेरिकी संस्थासँग कथालयले औपचारिक सम्झौता सम्पन्न गरेको छ।

उद्यमशीलता र वित्तीय चेतनाबारे विश्व प्रसिद्ध पुस्तक ‘रिच ड्याड, पोर ड्याड’ को नेपाली भाषामा अधिकृत अनुवाद तथा प्रकाशनको अधिकार कथालय इन्क प्रालिले प्राप्त गरेको छ। अमेरिकास्थित रिच ड्याड अपरेटिङ कम्पनीका तर्फबाट कार्यकारी प्रमुख किम कियोसाकी र कथालयका सह–संस्थापक तथा निर्देशक राजीवधर जोशीबीच यसबारे सम्झौता सम्पन्न भएको हो।

रोबर्ट कियोसाकीद्वारा लिखित उक्त पुस्तकले विश्वभर ४ करोडभन्दा बढी प्रतिहरू बिक्री गरिसकेको छ र ५१ भाषामा १०९ मुलुकमा प्रकाशित भइसकेको छ। नेपाली संस्करण कथालयको ‘वी रिड’ ब्रान्डबाट प्रस्तुत गरिनेछ।

नेपालमा विदेशी पुस्तकहरू बिना अनुमति अनुवाद वा छापिने प्रवृत्तिले नेपाली प्रकाशन उद्योगको अन्तर्राष्ट्रिय छवि कमजोर भएको उल्लेख गर्दै, निर्देशक जोशीले यस सम्झौताले नेपालको प्रकाशन विश्वसामु विश्वसनीयता स्थापित गर्न योगदान गर्ने विश्वास व्यक्त गरे।

अनुवादित संस्करण ‘धनी बुबा, गरिब बुबा’ शीर्षकमा पुस मसान्तभित्र बजारमा उपलब्ध हुने कथालयले जनाएको छ।