काठमाडौं । नेपालका लागि भारतीय राजदूत नवीन श्रीवास्तव मुटुको देब्रे नशामा ‘हर्टअट्याक’ भएर ग्रान्डी इन्टरनेसनल अस्पतालको आईसीयूमा उपचाररत रहेका छन् ।

हिजो शनिबार चम्पादेवी डाँडामा हाइकिङ गर्ने क्रममा छातीमा दुखाई अत्यधिक भएर उनी एक्कासि अचेत भएपछि उनलाई तत्काल नेपाली सेनाको हेलिकप्टरबाट उद्धार गरी ग्रान्डी इन्टरनेसनल अस्पतालमा पुर्याइएको थियो ।

हाइकिङमा उनीसँगै दूतावासका दुई जना अफिसर साथमा थिए। अस्पताल पुर्याउनासाथ प्रारम्भिक स्वास्थ्य जाँचपछि चिकित्सकलले तत्काल मुटुमा स्टेन राखेर ब्लकेज खोलेका थिए ।

चिकित्सकका अनुसार छातीको दुखाई दिउँसो साँढे एक बजेतिर देखिएतापनि उनलाई उद्धार गरी ग्रान्डी ल्याउन ४ बजे बजेको थियो । प्रारम्भिक उपचारपछि थप जाँच गर्दा उनलाई हृदयघात भएको पुष्टि भएको थियो । भारतीय राजदूत श्रीवास्तवको स्वास्थ्यमा सुधार हुँदै आएको उपचारमा संलग्न चिकित्सकले बताएका छन् ।