काठमाडौँ ।  नेपाली कांग्रेसको विशेष महाधिवेशनका लागि काठमाडौँको भृकुटीमण्डप क्षेत्रमा महाधिवेशन प्रतिनिधि तथा कार्यकर्ताहरूको आउने क्रम सुरु भएको छ।

देशभरका विभिन्न जिल्लाबाट प्रतिनिधिहरू काठमाडौँ आइपुग्न थालेका जिल्ला समन्वय समितिका संयोजक युवराज पाण्डेले जानकारी दिए । 

पुस २७ र २८ गते आयोजना हुने विशेष महाधिवेशनका लागि भृकुटीमण्डपमा मञ्च निर्माण, हल सजावट तथा प्राविधिक तयारी अन्तिम चरणमा पुगिरहेको महाधिवेशन व्यवस्थापन समितिले जानकारी दिएको छ ।

समितिका अनुसार शुक्रबारदेखि प्रतिनिधि दर्ता, परिचयपत्र वितरण तथा बसोबास समन्वयसम्बन्धी कामहरू पनि सँगसँगै अघि बढाइँदै छ। 

भृकुटीमण्डप परिसरमा पार्टीका झन्डा, ब्यानर तथा प्रचार सामग्री राख्ने काम भइरहेको छ भने प्रवेशद्वार व्यवस्थापन, सुरक्षासम्बन्धी समन्वय र यातायात व्यवस्थापनमा पनि तयारी तीव्र पारिएको छ।

नेपाली कांग्रेसका महामन्त्रीद्वय गगनकुमार थापा र विश्वप्रकाश शर्माको प्रत्यक्ष संलग्नतामा विशेष महाधिवेशन आह्वान गरिएको थियो । 

जनपरिचालन समितिले शुक्रबार पत्रकार सम्मेलन गर्दै  उद्घाटन सत्रमा ठुलो संख्यामा कार्यकर्ता तथा शुभेच्छुकको उपस्थिति रहने अपेक्षा गरिएको जनाएको छ ।